Жамбыл облысында агроөнеркәсіп кешені табысты дамуын жалғастыруда. Қазақстан Президенті Қасым-Жомарт Тоқаев атап өткендей, саланың басым бағыттары жерді тиімді пайдалану мен мал шаруашылығын дамыту болып қала береді.
Облыс әкімдігі ауыл шаруашылығы басқармасының мәліметінше, 2025 жылы 640 мың гектар алқаптан 3,2 миллион тонна ауыл шаруашылығы өнімі жиналды. Биыл егіс көлемі 627,7 мың гектарды құрайды, бұл өткен жылмен салыстырғанда 12,3 мың гектарға аз.
Дәнді және дәнді-бұршақты дақылдарға 356,5 мың гектар, майлы дақылдарға — 40 мың гектар, қант қызылшасына — 8,5 мың гектар, картопқа — 8,4 мың гектар, көкөніске — 23,6 мың гектар, бақша дақылдарына — 4,7 мың гектар, мал азықтық дақылдарға 186 мың гектар жер бөлінген.
Егіс алқаптарының қысқаруы №85 суару каналының жөндеу жұмыстарына байланысты. Жоба Ислам даму банкі мен Еуропалық қайта құру және даму банкі арқылы қаржыландырылуда. Осыған байланысты суармалы суға тәуелді көкөніс және бақша дақылдарының көлемі 15,5 мың гектарға қысқартылды.