Қазақстан Президенті қоғамдық тәртіп пен қауіпсіздікті қамтамасыз ету мәселесіне ерекше тоқталып, бұл бағыттағы жұмыстар жалғаса беретінін мәлімдеді. Мемлекет басшысының айтуынша, қазіргі күрделі геосаяси жағдайда елімізге татулық пен тұрақтылық аса қажет.
Президент құқық қорғау органдары заң бұзушылықтарға қатысты қатаң шаралар қабылдауы тиіс екенін атап өтті. Оның пікірінше, заң талаптарының мүлтіксіз орындалуы қоғамдағы әділдік пен қауіпсіздіктің кепілі болып табылады. Сондықтан мемлекет құқықтық нигилизммен күресіп, азаматтардың заңға деген құрметін арттыруға күш салуы қажет.
Сондай-ақ Мемлекет басшысы кейбір азаматтардың құқықтық тәртіпті күшейтуге қатысты сын-пікірлеріне тоқталып, қоғам үшін ең маңыздысы қауіпсіздік пен тұрақтылық екенін айтты. Бұл ретте «Заң мен тәртіп» саясаты халықтың сұранысынан туындағанын ерекше атап өтті.
Президенттің сөзінше, еліміздің тұрақты дамуы үшін бүкіл қоғам, мемлекеттік органдар мен жергілікті атқарушы билік өкілдері қоғамдық тәртіпті нығайтуға атсалысуы керек. Өйткені заң үстемдігі сақталған жерде ғана оң реформалар жүзеге асып, елдің дамуына жол ашылады.