Бүгінгі күні Қазақстанның қай өңірін алсақ та, ең үлкен бәсекелестік зауыттар мен ғимараттар арасында емес, талантты жастар үшін жүріп жатыр. Қай өңір білімді жастарын сақтап қала алады, қай өңір сол жастарға мүмкіндік бере алады, ертең сол өңір дамиды.
Соңғы жылдары Жамбыл облысында байқалмай келе жатқан бір жақсы өзгеріс бар. Өңірде ғылым біртіндеп үлкен аудиториялар мен жабық зертханалардың шеңберінен шығып, жастардың күнделікті өмірінің бір бөлігіне айналып келеді. Бұл өзгерістің алдыңғы қатарында Шерхан Мұртаза атындағы Халықаралық Тараз университеті тұр.
Бұрын студенттің жетістігі тек жақсы баға алумен өлшенетін. Қазір жағдай өзгеріп жатыр. Студент ғылыми жоба жасайды, халықаралық симпозиумдарға қатысады, жаңа идея ұсынады, тіпті ғылыми зерттеуді кәсіпкерлік бастамаға айналдыруға ұмтылады. Бұл – мүлде басқа буынның қалыптасып жатқанын көрсетеді.