Қыс мезгілінің құрсауы сөгіліп, төңірекке сұлулық сәулесін төгіп көктем келісімен, бар жаратылыс құрметі мен ілтипатын әйелдер қауымына арнайды. Бір-бір үйдің шырағы болып жарқырап, гүлі болып жадырап жүрген бұрымдылар мейірімді ана, асыл жар, отбасының ұйытқысы ғана емес, мемлекетіміздің дамуына өзіндік үлестерін қосып жүрген іскер жандар ретінде де бағалануда.
Бір қолымен бесікті, бір қолымен әлемді тербеткен аналарға құрмет тек бір күнмен шектелмеуі тиіс. Оларға деген шынайы құрмет күн сайын жалғасын табуы қажет. Өйткені ана – әлемнің жан дүниесі, өмірдің бастауы мен таусылмайтын жалғасы. Әйел-ана – өмірдің өзі, бақыт пен берекенің көзі, нәзіктік пен көркемдіктің сәні, мейірімділік пен парасаттың мәні.
Көктемнің жайма-шуақ күнімен қатар келетін Халықаралық әйелдер мерекесі аудандық Мәдениет үйінде кеңінен аталып өтті. Даналықтың үлгісіндей болған ақжаулықты аналар мен қызғалдақтай құлпырған көркем қыздардың шуақ шашқан жүздері әдемі мерекелік көңіл күйді одан әрі ажарландыра түсті.
Салтанатты жиында сөз алған аудан әкімі Ерлан Қыдыралыұлы ақ жаулықты әжелер мен ардақты аналарды, сұлу да сымбатты қыз-келіншектерді төл мерекесімен құттықтап, дендеріне саулық, отбасыларына амандық тіледі. Мұнан кейін облыс және ауданның әлеуметтік-экономикалық дамуына қосқан үлесі үшін және Халықаралық әйелдер күні мерекесіне орай еңбек ардагерлері Ділдакүл Атабаева мен Сәрсекүл Қарасартоваға, аудандық орталық аурухананың шұғыл көмек көрсету бригадасының фельдшері Дәмеш Әлімқұловаға облыс әкімінің Құрмет грамотасын, «Ақ бидай» шаруа қожалығының төрайымы Ирина Чумаковаға, аудандық тарихи-өлкетану музейінің экскурсаводы Индира Мыңжасароваға, Амангелді атындағы орта мектептің қазақ тілі мен әдебиеті пәнінің мұғалімі Сәуле Майкеноваға облыс әкімінің Алғыс хатын табыс етті. Ал, «Jambyl ET MS» ЖШС директоры Света Шаушенованы, аудандық прокуратураның аға прокуроры Жазира Миралиеваның аудан әкімінің Құрмет грамотасымен марапаттады.
Тілекшілер тізімін жалғаған аудандық мәслихаттың хатшысы Райымбек Сейітов ақжаулықты аналарға ақжарма тілегін арнап, аудан әкімі аппараты мемлекеттік-құқықтық жұмыс бөлімшесінің басшысы Беназир Жамбылбекқызын, аудандық полиция бөлімі көші-қон қызметінің жетекші маманы Сандуғаш Қалжанованы, аудандық Мәдениет үйінің бас есепшісі Анар Тәжібаеваны Жамбыл ауданының Құрмет грамотасымен марапаттады.
Салтанатты жиын соңында аудандық Мәдениет үйінің өнерпаздары көпшілікке көтеріңкі көңіл күй сыйлады. Құшақтары гүлге, көңілдері шаттыққа толы әйел-аналар мерекелік жиыннан ерекше ризашылықпен тарқасты.
Концертте 300-ге жуық әжелерге, аналарға, қыз, келіншектерге аудан әкімінің мерекелік құттықауы мен сыйлықтары үлестірілді.