Бүгін Жамбыл ауданының қос бірдей балуаны екі салмақ дәрежесінде Азия чемпионы атанды. Бұл туралы Жамбыл аудандық мәслихат депутаты Дәурен Ахметжаев өзінің әлеуметтік желідегі парақшасында бөлісті.
— Спорт — елдің абыройын асқақтататын сала. Бүгін Ливан мемлекетінен қуанышты хабар келіп жетті. Самбо күресінен өтіп жатқан Азия чемпионатында ел намысын қорғаған Бесағаш ауылының тұрғыны, сыныптастар Әділет Ахметқали мен Нұғман Бейбарыс өз салмақ дәрежелерінде белдесіп, қарсылас біткенді қапы қалдырды. Жерлестеріміз Азия чемпионы атанды. Бесағаш — чемпиондар ордасы. Мұнда әлем, Азия, ел чемпиондары шыққан. Ендігі кезекте ауылда еңселі спорт кешені бой көтерер болса, жетістіктің қатары көбейе бермек. Жігіттердің жеңісімен құттықтаймын! Азия чемпиондарын асыға күтеміз,-делінген жазбада.
Ел намысын қорғап, чемпион атанған ұландардың жеңісі құтты болсын!
Жамбыл ауданы әкімдігінің баспасөз қызметі