Жаздың ыстық, жанға жайлы шуақты күндерін суық, жаңбырлы, сұрғылт күз келіп алмастырды. Қылышын сүйреткен қыс мезгілімен де қауышар күн алыс емес. «Кәрі құда» қатал мінез көрсеткенде жағдайдың қалай өрбитінін ешкім болжай алмайтыны түсінікті. Оның қаһарына төтеп беру әрине, жан-жақты дайындықты талап етеді.
Көзбен көрген көп жайға қанықтырады» демекші, аудан әкімінің міндетін атқарушы Нұрлан Несіпбеков, аудан әкімдігінің тұрғын үй-коммуналдық шаруашылық, жолаушылар көлігі және автомобил жолдары бөлімінің басшысы Қуаныш Қарашолақов, аудан әкімінің бас инспекторы Береке Нәсіпбекұлымен Ақбастау, Жамбыл, Қаратөбе, Айшабибі, Көлқайнар ауылдық округтерін аралап, жай-күйімен танысты.
Байқағанымыздай, жылыту маусымына дайындық жіті назарда. Аудан бойынша әлеуметтік нысандар қылышын сүйретер қыстың құрсауынан қаймықпайтындай дәрежеде. Алайда, кейбір қажеттіліктер толықтырылса, нұр үстіне нұр болары сөзсіз.
Қыс – салғырттық пен қателікті кешірмейтін қатал сыншы. Халқымыз «Қыстың көзі қырауда» дейді. Қалай болғанда да, ауданға қарасты округтердегі барлық нысандардың қазандықтары сақадай-сай болғаны абзалырақ…