Соғыстың соңғы солдаты дауыс берді
Бүгінгі ұрпақтың «Аһ» ұратыны бар. Ол – соғыстың соңғы куәгерлерінің жыл өткен сайын арамыздан азайып бара жатқаны. Ауданымыздағы Ұлы Отан соғысының соңғы солдаты – Қасен Шанбаевтың жүріп еткен жолдары туралы айтар әңгіме аз емес.
Бүгін яғни, ҚР Президентінің кезектен тыс сайлауында Айшабибі ауылының тұрғыны, Ұлы Отан соғысының ардагері өз дауысын үйден берді.
Ғасырға аяқ басқан Қасен Шанбаев Жеңіс сағатын соқтыруға үлкен үлес қосқан ардагер. Қысылтаяң шақты бастан өткерген жауынгердің аузынан «Құдай елімізді бейбітшіліктен айырмасын» деген тілегі түскен емес. Оқ пен оттан аман қалып, елге жеңіспен оралып, соғыстан кейінгі қиын-қыстау шақта елдің өсіп-өркендеуіне үлес қосқан ардагер ауданымыздан майданға аттанған 9341 жауынгермен бірге сұрапыл соғыс жылдары толарсақтан су кешіп, ұрыс даласында қаһармандықпен көзге түсті.
Қасен Шанбаев 1923 жылы 19 қаңтарда Жамбыл ауданы Головачевка (қазіргі Айшабибі) ауылында дүниеге келген. 1935 жылы мектепке барып, 1942 жылы жетінші сыныпты бітіріп, Сол жылдың 19 қаңтарында әскерге алынған.
Бүгінде Қасен атадан тараған 3 ұл, 3 қыздың қатары 16 немереге, 41 шөбереге, 5 шөпшекке жетіп отыр.