Әлеуметтік саясаттың негізгі міндеті және оның тиімділігінің басты өлшемі Қазақстан халқының әл-ауқатын ұдайы арттыру болып табылады десек, халықты әлеуметтік қолдау жөніндегі белсенді шаралардың арқасында елімізде кедейлік деңгейі, яғни табысы ең төменгі күнкөріс деңгейінен төмен халықтың үлесі соңғы жылдары едәуір төмендеген. Елдегі кедейлік деңгейінің серпінді төмендеуі қолданыста бар мемлекеттік бағдарламаларды іске асырудың нәтижесі. Бұл үдерісте «Мемлекеттік атаулы әлеуметтік көмек туралы» Заң шешуші рөл атқарады. Құжатта қандай да бір объективті себептерге байланысты өз тыныс-тіршілігі үшін жағдайларды қамтамасыз етуде қиындық көріп отырған табысы аз азаматтарға атаулы әлеуметтік көмек көрсету көзделген.
М.Төлебаев атындағы өнер мектебінде өткен кездесуде атаулы әлеуметтік көмек мәселесі кеңінен сөз болып, осы жылы енгізілген, келер жылы күшіне енетін өзгерістер талқыға салынды. Облыс әкімдігі жұмыспен қамтуды үйле стіру және әлеуметтік бағдарламалар басқармасының бөлім басшысы Марал Ділдәбекова атаулы әлеуметтік көмек алатын мұқтаж жандарға мәнжайды Президент Жолдауымен сабақтастыра отырып түсіндірді.
– Мемлекет басшысы ҚасымЖомарт Тоқаевтың «Әділетті мемлекет. Біртұтас ұлт. Берекелі қоғам» атты Жолдауында елімізде алдағы уақытта жүргізілетін өзгерістердің, саяси, әлеуметтік және экономикалық реформалардың нақты бағыт-бағдары белгіленді. Ең алдымен, ең төменгі жалақы деңгейі 60 мың теңгеден 70 мың теңгеге дейін көтеріледі. Бұл 1,8 миллион азаматтың табысына тікелей әсер етеді. Сонымен қатар ең төменгі жалақы мөлшерін біртіндеп ұлғайтуға мүмкіндік беретін жаңа тәсіл енгізіледі.
Халықтың әл-ауқатын жақсартудағы келесі маңызды қадамның бірі – атаулы әлеуметтік көмектің бірыңғай жүйе сін құру. 2023 жылдан баст ап Отбасының цифрлық картасы қалыптастырылады. Онда әрбір азаматқа көрсетілетін мемлекеттік қолдау іс-шаралары біріктіріледі. Бұл мемлекеттік қолдау бойынша нақты, ашық және түсінікті ақпарат алуға мүмкіндік береді, – деген Марал Аманжолқызы қатысушылар тарапынан қойылған сауалдарға нақты жауап берді.
Келелі кездесуге аудан әкімдігі жұмыспен қамту және әлеуметтік бағдарламалар бөлімінің сектор меңгерушісі Айгерім Шынтасова, аудандық халықты жұмыспен қамту орталығы директорының орынбасары Алтай Стамқұлов, әлеуметтік сала мамандары қатысып отырды.
Бұл күні атаулы әлеуметтік көмек бойынша кездесулер ауданға қарасты барлық ауылдық округте болып өтті.