Ақбұлым ауылының тұрғындары аудан әкімі Ерлан Қыдыралыұлының жергілікті жұртшылықпен кездесуінде бауын тапса байламын таппай жүрген мәселелерді айтып, шешілу жолдарын қарастыруын өтінген еді.
Соның бірі – Бесбаев 1, 2, 3 көшесінің бүгінгі жай-күйі. Жаңбырлы күні лайы, аптап ыстықта шаңы көтерілетін көшелер асфальтталса деген ақбұлымдықтардың өтінішін назарға алған өңір басшысы аудандық бюджеттен қаржы қарастыратынын, алдағы уақытта бұл мәселе өз шешімін табатынын айтып, уәдесін берген болатын. Ақбұлым ауылдық округінің әкімі Ердос Бейсеновтің айтуынша, бүгінде ұзындығы 1,6 шақырым, ені 5 метрді құрайтын көшелерге жөндеу жұмыстары жүргізілуде. «ТаразПрогресс» жауапкершілігі шектеулі серіктестігі асфальттау жұмыстарын қолға алған. Талаптардың сақталуы мен жол жабындысының сапасы – округ әкімінің тікелей бақылауында. Ауыл азаматтары игі іске алғыстарын айтып, ризашылықтарын білдіруде.