Халықаралық қарттар күні аудан әкімдігінің дене шынықтыру және спорт бөлімі ардагерлер арасында салауатты өмір салтын насихаттау, оларға мерекелік көңіл-күй сыйлау мақсатында бильярдтан және шахматтан аудандық турнир ұйымдастырды. Оған 40-қа жуық ардагер қатысып, өз араларында кім мықтыны анықтады.
Турнирдің ашылуында сөз алған аудандық ардагерлер кеңесінің төрағасы Бақыт Сырлыбаев жарысты ұйымдастырушыларға, игі шараның басы-қасында жүрген азаматтарға алғысын айтып, ризашылығын білдірді.
Аңғарғанымыздай, ардагерлердің бильярд ойынына деген құлшынысы жоғары. Жақсы ойын өрнегін көрсете білді. Бір сөзбен айтқанда, бұл жарыс тартысқа толы болды. Кейбір кездесулер бірнеше партияға созылды. Нәтижесінде, Сәрсен Күзербаев бірінші орынды, Есенбек Қалдыбеков екінші орынды, Тілеухан Маршев үшінші орынды иеленді.
Ал, шахматтан өткен жарыста Сарсенғали Жұбатқановқа бірінші орын, Қозыбақ Ақмырзаевқа екінші орын, Данияр Патаевқа үшінші орын бұйырды. Өзіндік ойын өрнегімен көзге түскен Жәнібек Жолдаев «Үздік ойыншы» атанды.
Соңынан жеңімпаздар мен жүлдегерлер диплом және медальдармен марапатталды.
Ильяс Қалыбеков