Қызылша ауруының қауіптілігі және алдын алу жолдары

Қызылша — өте жұқпалы вирустық инфекция. Ауру көбіне балалар арасында кездескенімен, ересектер де жұқтыруы мүмкін. Қызылшаның қауіптілігі оның ауыр асқынуларға әкелуінде. Атап айтқанда, пневмония, энцефалит, көру қабілетінің төмендеуі, тіпті өлім-жітім жағдайлары да тіркелуі мүмкін.

Қызылша ауа-тамшы жолымен таралады (жөтелгенде, түшкіргенде). Науқаспен бір бөлмеде ұзақ уақыт болған жағдайда, вакцина алмаған адамның жұқтыру қаупі 90 пайызға дейін жетеді.

Аурудың негізгі белгілері:

• Дене қызуының 38–40°C-қа дейін көтерілуі;
• Жөтел, тамақтың ауыруы, көздің қызарып, жас ағуы;
• 3–4 күннен кейін бөртпенің бүкіл денеге таралуы;
• Әлсіздік, тәбеттің төмендеуі.

Алдын алу жолдары:

• Уақытылы вакцинациялау — қызылшадан қорғанудың ең тиімді жолы;
• Балаларға екпе 12 айлық кезінде және 6 жасында егіледі;
• Ересектер екпе алмаған немесе екпе мәртебесі белгісіз болған жағдайда қайта вакцинациядан өте алады;
• Жеке гигиена талаптарын сақтау, бөлмені жиі желдету;
• Ауру адаммен қарым-қатынасты шектеу, белгілері бар адамдарды оқшаулау.

Ата-аналарға үндеу:

Балаларды уақытында вакцинациялау — олардың денсаулығын қорғаудың ең басты кепілі.

Ересектерге кеңес:

Өздеріңіздің екпе мәртебелеріңізді тексеріп, қажет болған жағдайда қайта вакцинациядан өтіңіздер.

Жамбыл облысы

санитариялық-эпидемиологиялық

бақылау басқармасының басшысы

Ғ. Әбділда