Бүгін Шәкен Ниязбеков ауылында 100-ге жуық адам тұрғын үй салуға жер телімін алды.
Жұртшылықтың қуанышына ортақтасуға келген Жамбыл ауданының әкімі Сәкен Арубаев бұл мәселені көпшілік көптен бері қаузап келгенін айтты.
– Бүгін 97 жер учаскесі кезекте тұрған азаматтарға үлестіріледі. Өткен жылғы кездесуде осы жағдайды жеткізген ауыл тұрғындарының өтініші бүгінде орындалуда. Облыс әкімі Бердібек Машбекұлы қолдауымен ауданда биыл 1864 жер учаскесіне инфрақұрылымдық-инженерлік жұмыстар жүргізілді. Осы жаңа тұрғын үй алқабында зәулім үйлер бой көтеріп, әрбір отбасымен әрбір шаңырақта береке-бірлік болуына тілектеспін.
Жаңа тұрғын үй алқабы құтты болсын! Бақ-береке қонсын, – деді өңір басшысы құттықтауында.
Жер кезегін көптен бері тағатсыздана тосып жүрген ауыл азаматы Зарина Брлысбекова
– Үлкен шаңырақта тұрып келеміз. Осыдан 10 жыл бұрын әкімдікке жер кезегіне тұрған едік. Өткен жолы аудан басшысының тұрғындармен кездесуінде осы мәселені көптеген азаматтар көтерді. Бүгінде сол тілегімізді орындап жатқанына алғысым шексіз. Кеше әкімдіктің жігіттері кезегіңіз келіп тұр, мына уақытта мына жерде болыңыз дегенде қатты қуандым. Берілген 14 соттық жерге тұрғын үй салудың қарекетіне тездетіп кірісемін, – дейді ол.
Айта кету керек, ауданда 1864 азаматқа 7 елді мекеннен жер беру жұмыстары қызу жүргізілуде. Соның бірі — Шәкен Ниязбеков ауылы. 97 жер учаскесіне электр жарығы, ауыз су, «көгілдір отын» жүйесі жүргізілген.
АЛДАҒЫ КҮНДЕРІ ЖЕР ТЕЛІМІ БЕРІЛЕТІН АУЫЛДАР ТІЗБЕСІ
Алдағы күндері Айшабибі ауылынан 382, Бірлесу-Еңбек ауылынан 130 жер теліміне электр жарығы, газ желісі, ауызсу, Бектөбе ауылынан 143, Аса ауылынынан 811 жер учаскесіне электр жарығы, газ желісі, Қызылқайнар ауылынан 222 жер теліміне қиыршық тас төсеу, электр, газ желісі тартылған жер учаскелері кезектілік тәртібімен беріледі.
Ақжігіт Жетпісбай,
Жамбыл ауданы.